Evribadi noa seh dat di werl di geh hata ahn hata evri yaa. Laad, sohntaihn ih feel laik di werl di geh hata evri day! Laytli, nat eevn wahn lee breez waahn bloa. Ahn wen ih doo bloa, da loan hat ayaa di breez di push rong.
Soh, da weh wi mos du? Di saiyentis dehn tel wi bowt klaimit chaynj, bot Ah wanda sohntaihn if eech ahn evri wan a wi di geh di mesij. Da not jos bowt wi stap kot dong aal di chree dehn er bowt jos plaant bak moa chree. Wi need dat, fi shoar. Bot evri day, eech a wi ku du sohnting, laik noh di ways di waata, er laik noh di yooz spray ting, laik spray aamstik. Ahn eena disya hat weda, wi need aamstik, fu shoar shoar shoar! Sohn peepl seh dehn di goh nachral nachral, er dat di kemikal dehn eena sohn aamstik noh gree wid dehn. Soh sohn peepl laik yooz wahn lee laim anda dehn aam wen dehn don bayd. Laim kip bak aamsent! Yes, da chroo! Er, if you noh waahn yooz laim fu tee, dina, tee, den if yu hapn fi kech sohnbadi bad aamsent, da wahn hel a wahn ting fi geh rid a da sent! Da deh laim kohn een! Biloa, wi di shyaa chree werd fahn di Kriol-Inglish dikshineri weh ga fi du wid aamsent!
aam n. armpit; body part from above the elbow to the shoulder, including the armpit.
Da bwai aam aalwayz stink kaaz ih noh laik put ting anda ih aam.
That boy’s armpit always stinks because he doesn’t like to use deodorant.
aamsent n. underarm odour.
Mi grani yooz laim fi geh rid a pikni aamsent.
My granny uses lime to get rid of children’s underarm odour.
aamstik n. deodorant.
Tudeh day moas pipl yooz aamstik steda Speero powda.
These days most people use deodorant instead of Spiro powder.
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: sudz142@gmail.com
Vizit: www.nationalkriolcouncil.org