Janiweri da di mont fi staat op nyoo: nof Nyo Yaaz rezoloosan deh! Tap a di lis da bowt looz wayt, jrap sohn pongz, fi lat a wi! Neks eena lain da fi stap put aaf ting wi doz aalwayz waahn du, speshali if da oalda wi di geh oalda. Wel, fu shoar evriday aal a wi di geh lee oalda, bot wen Ah taak bowt geh oalda, Ah meen oava fifti yaaz er soh! Now dat mee di wach siksti neks yaa, eniting anda fifti song yong tu mee! Fu chroo. Da noh joak wen yu waak laik yu aalwayz doz waak, bot now lee payn di schraik yu boan jaint! Laad, yu si mi kraas … taim fi rob op wid lee Viks er skajineel.
Soh, fi aal a wi weh di mek er don mek Nyoo Yaaz rezolooshan, chek owt dehnya Kriol wod ahn frayz fi wen wi jrap bak pahn weh wi waahn du:
| KRIOL | INGLISH |
| mek op yu main | make up your mind; decide |
| papisho | mock, ridicule, make a fool of |
| payni op | aching |
| poko-typempo | ordinary, as in mediocre |
| yu si mi krass! | (interjection) said when slightly exasperated |
Mataz bee if Ah feel payni op; Ah beta mek shoar Ah liv op tu mi Nyoo Yaaz rezolooshan fi jrap lee wayt er mi fren den wahn tek mi mek papisho! Fu shoar dehn wahn seh mee ahn mi Nyoo Yaaz rezolooshan oanli poko-tyempo! Aiiiiii…yu si mi kraas! Ah beta mek op mi main fi eksasaiz moa ahn eet les!
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: sudz142@gmail.com
Vizit: www.nationalkriolcouncil.org