Yes, unu don noa seh dat harikayn seezn staat op fi 2020: Joon tu Novemba da wen tingz eena di Atlantik Oashan di bobl op ahn bail op. Pahn tap, eena dis 2020 koroanavairos taim, da di laas ting wi waahn tink bowt, speshali sins di weda-pipl seh dat dis 2020 mait aktiv bad! Wi pray seh dat no staam kech wi da Bileez fi dis 2020 Harikayn Seezn. Bot, eevn soh, wi noh fi stap geh redi shud-in-kays wahn harikayn kohn vizit wi. Vizit? Hahahaha! Da no joak, doh! Harikayn ga wahn way fi krash op wi plays, ahn sohntaihn brok op wi plays, di fling bowt aal wi ting dehn—ahn pray nobadi kech dehn ded er wayk op ded.
Sins di 1960s, di harikayn dehn ga naym. Eena di Atlantik, wi kaal dehnya “harikayn.” Dat da “hurricane” eena Inglish. Eena Ayzha, dehnya big big staam nayhn “taifoon.” Eena di Inglish langwij, da “typhoon.” Eena ada plays, dehnya big big staam da “saikloan.” Eena di Inglish langwij, dis da “cyclone.”
2020 Atlantik Harikayn Seezn
| Arthur (Aata) | Hannah (Hana) | Omar (Omar) |
| Bertha (Berta) | Isaias (Aizaiyas) | Paulette (Paalet) |
| Christobal (Kris) | Josephine (Josefeen) | Rene (Rene) |
| Dolly (Dali) | Kyle (Kail) | Sally (Sali) |
| Edouard (Edwad) | Laura (Laara) | Teddy (Tedi) |
| Fay (Fay) | Marco (Maako) | Vicky (Viki) |
| Gonzalo (Gonzaalo) | Nana (Nana) | Wilfred (Wilfrid) |
Stay sayf, evribadi…pripyaa gud gud-wan!
Pahn tap, noh figet bowt di koroanavairos!
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: sudz142@gmail.com
Vizit: www.nationalkriolcouncil.org