Da stil di Lov Mont! Ih nayli don, bot ih noh don yet. Yu mi feel it Valentaims Day 2021? Er maybe yu di feel it now? Wel, wee da “Weh Wi Ga Fi Seh” ga dis fi seh: If yu tink yu noh ga nobadi fi lov yu, yu rang! Noh mata wat, yu ku lov op yuself! YES! Soh, how yu ku lov op yuself? How yu ku shoa yuself sohn lov? Chek owt dehnya ting dehn yu ku du. Noh gi nobadi di powa fi mek yoo feel bad bowt yuself. Ahn mek shoar yoo noh di du notn weh bad (er tu bad!).
- Tudeh, tumaaro ahn evriday: Smail, smail, ahn smail sohn moa! Memba seh dat ih tek lat moa fays mosl fi frong dan fi smail, soh wen yu smail ahn noh frong, yu fays wahn les rinkl op!
- Fi 10 minitz evri day, stap, sloa dong ahn smel di flowaz! Ih noh hafu meen yu ga chroo chroo flowaz fi smel, bot dat uda nais tu! Plos ih uda braitn op di room!
- Chrai fi gi weh er geh rid a dehn lat a ting dehn weh jos deh bowt di plays. Tink bowt it: Yu reeli need soh moch difrant shooz wen da oanli 2 er 3 a dehn yu reeli laik yooz moas a di taim? Pahn tap, da weh yoo ga fi goh soh erjent dehnya dayz? Memba seh dat koroanavairos stil deh rong. Ahn di way tingz luk, ih maita deh rong fi wahn taim yet.
Soh sata … Stay sayf … Stay gud!
Silvaana Udz, Ed.D da fahn Bileez. If yu waahn tel shee bowt sohnting speshal fu put eena dis Kriol aatikl, eemayl: sudz142@gmail.com
Vizit: www.nationalkriolcouncil.org